Равшан Жээнбеков №1 ТИЗО кызматкерлерине карата да, козголгон кылмыш иши боюнча да азыркы учурда конкреттүү даттануусу жок

2020-жылдын 30-январында Акыйкатчы аппаратынын кызматкери Равшан Жээнбековго жолугуп сүйлөшүү үчүн №21 мекемеге (ТИЗО-1) барып келди.

Сүйлөшүү учурунда Р. Жээнбеков №21 мекеменин кызматкерлерине карата конкреттүү арыз-даттануусу жок экендигин билдирди. Бирок, ал жаткан камераны текшерип-тинтүү түнкү убакта болгонуна нааразычылыгын билдирди.

Тергелип жаткан Р. Жээнбеков ал жана аны менен камерада бирге жаткан адамдар түнкү учурда эс алганга укуктуу. « Бир күн кечке чейин тергөө иштеринде болгондуктан, кечкисин мен эс алышым керек. Кызматкерлер саат 20-00 кийин тинтүү кылганга укугу жок. Андан тышкары ченемге ылайык, ар бир камерада бир кишиге 3.5 кв.м. жер болушу зарыл. Бирок, бул  ченем сакталбай жатканын мен ММК аркылуу да айткан болчумун», - деди ал.

Р. Жээнбеков №1 ТИЗО кызматкерлерине  конкреттүү арыз-даттануусу жок болгондуктан,  ошондой эле өзүнө карата козголгон  кылмыш иши боюнча да азыркы учурда конкреттүү даттануусу жоктугунан,  КР Акыйкатчысына жазуу түрүндө кайрылган жок.