Чаткал районундагы В.И. Ленин атындагы мектеп-интернатта балдар өз кийимдерин таштекке салып колго жууйт

“Укук Кербени” долбоорунун алкагында КР Акыйкатчысынын аппарат жетекчиси А.Азарбеков, ошондой эле Акыйкатчы институтунун кызматкерлери А.Анарботоев менен А.Тожиханов “Кыргыз Республикасынын Омбудсмени жөнүндө” мыйзамынын 8-беренесинин 5-бөлүгүнүн жана 3 –берененин 3-бөлүгүнүн негизинде Жалал -Абад облусунун Чаткал районунун В. И. Ленин атындагы мектеп-интернатына мониторинг жүргүзүштү.

 Мониторинг учурунда төмөнкүлөр ачыкка чыкты:

1) Мектеп ашканасында гигиеналык каражаттар жетишсиз (самын жана антисептиктер); жашылчалар жерде территорияны тазалоо үчүн буюмдар менен аралашып (шыпыргы, калак) жатат; тамак-аш үчүн текчелер жок; тамак жасоо үчүн кесүүчү стол жок (атайын столдун ордуна парта колдонулат); бир гана тоңдургуч камера бар.

2) Медициналык пунктта балдар-бейтаптар үчүн керебеттер талкаланган; киринүүчү жай жок (ванна же душ бөлмөсү); санитардык түйүн жок, башка бардык санитардык ченемдер да жокко эсе.

3) Кир жуучу жайда кир жуугуч машиналар жок, жашы жете элек мектеп окуучулар өздөрү кийимдерин таштекке суу куюп алып колго (коридордо) жуушат, кир жуучу жай өзү шейшеп, төшөнчүлөрдү жууш үчүн гана колдонулат; ысык суу жок, аны ар кандай жолдор менен жылытуу керек.

4) Интернаттын имараттарында суу түтүгү жана канализация жок.

5) Жалпы душ бөлмөсү начар абалда, мындан тышкары жуунучу бөлмө менен жатакананын ортосундагы аралык 700-800 м.,ден ашык, анын натыйжасында күз-кыш мезгилинде балдар ар кандай жугуштуу ооруларга чалдыгуу коркунучунда.  

Бул интернаттын жетекчисинин айтымында, бүгүнкү күнгө чейин “Ага Хан Фонду” интернаттын имараттарын жана жатаканаларын суу менен камсыз кылуу үчүн, ошондой турган мончону оңдоо үчүн 3 миллион сом бөлгөн. Мындан тышкары, БУУӨП ушул эле максаттарга 1,2 миллион сом бөлгөн. Ошондой эле, ал өткөн 5 жыл ичинде интернаттын жетекчилиги ашкананы жана №1 окуу корпусун оңдоого грант тартууга жетишкенин айтты. "Биз окуучуларыбыздын билим алуусу, тамактануусу жана жашашы үчүн тийиштүү жана ылайыктуу шарттарды түзүүгө абдан аракет кылып жатабыз, бирок мамлекеттин колдоосусуз бардык көйгөйлүү маселелерди чечүү мүмкүн эмес, ошондуктан биздин билим берүү мекеме ушундай кейиштүү абалда, бул балдардын укугун бузуу болуп саналат”, - деди интернаттын директору.  Ошондой эле «Учурда балдар жана кызматкерлер үчүн жатаканалар электр жылыткычтары менен жылытылат, ал эми жылытуу мезгилинде электр энергиясы үзгүлтүккө учураса, бизде генератор жок болгондуктан, бөлмөлөрдү жылытууга мүмкүнчүлүк жок. Бул тууралуу жогорку жактагы жетекчиликке кабарланган"-деп кошумчалады.

Кыргыз Республикасынын Акыйкатчы аппараты Кыргыз Республикасынын Билим берүү министрлиги шашылыш түрдө бардык зарыл чараларды көрүүгө жана бул билим берүү мекемесинин тарбиялануучуларына, мугалимдерине жана кызматкерлерине туура жана мыйзамдарга ылайык шарттарды камсыздоо үчүн натыйжалуу жардам көрсөтүүсү зарыл деп эсептейт.

Эске салсак,"Укук кербени" долбоорун ишке ашыруу Европа Биримдигинин "Кыргыз Республикасында мыйзам үстөмдүгү, 2 -баскыч" программасынын колдоосунун аркасында мүмкүн болду.