Акыйкатчы Баткенде аргасыз жер которуп келишкен аялдар менен жолугушууларды өткөрдү

Акыйкатчы Институту Кадамжай, Баткен райондорунда, Баткен шаарында аргасыз жер которуп келишкен аялдар менен жолугушууларды өткөрдү 

 2022-жылдын 27-28-сентябрында Кыргыз Республикасынын Акыйкатчысы А. Абдрахматова жана Омбудсмен Институтунун кызматкерлери менен биргеликте Баткен облусунан аргасыз качкан айымдардын арасында сурамжылоону Марказ а., Кадамжай ш., Баткен ш. убактылуу жайгашкан жерлеринен өткөрдү.  

Акыйкатчы Институтунун универсалдык сурамжылоосунун алкагында, Тажик аскерлери таңкы саат 6-7 чамасында тынч жаткан элге ок атып, үйлөрүнүн, көчөлөрүн жардырып кыргыз элине кол салгандыгы, куралдуу аскерлердин аркасында жарандык кийимчен адамдар менен бирге тажик тез жардам кызматы жүргөндүгү маалым болду.  

Акыйкатчынын сурамжылоосуна катышкан айымдар төмөнкү 

көйгөйлөрдү чечүүгө көмөктөшүүнү суранды: 

1) Чек ара маселесин чечип, коопсуздукту Өкмөт тарабынан камсыздоону. 

2) Гуманитардык жардамдарды аткыланган айылдарда калган үй-бүлөлөргө да бөлүштүрүп берүүнү. 

3) Кышкы кийимдер менен камсыз кылып берүүнү, балдарды окуу процессине тез арада тартуу менен, окуу куралдары, кийим менен камсыз кылууну.  

4) Банктарда кредиттери бар жабыркаган үй бүлөлөргө жеңилдиктерди берүүнү. 

5) Жаш балалуу үй бүлөлөргө жөлөк пул берүүнү камсыздоо. 

Акыйкатчынын сурамжылоосуна алардын көпчүлүгү Көк-Таш, Мин-Булак, Достук, Ак-Сай, Көк-Терек, Мин-Өрүк, Ак-Татыр, Кара Бак айылдарынан келишкендигин билдирип, бир нече жолу аргасыз жер которуп качышкандыктарын, кооптуу шартта жашоодо мүмкүн эместигин баса белгилеп айтышты. Андан сырткары, Тажикстан менен чектешкен жерлерге коюлган тосмолордун алынып салуусуна нааразычылыгын билдиришти.