Акыйкатчы Институту аймактагы өкүлчүлүктөрүнүн иштөө шарттарын жакшыртууда

Бүгүн, 19-декабрда Акыйкатчы Институтуна кызматтык автоунааларды тапшыруу аземи болуп өттү. 

Иш-чарага Президенттин иш башкармалыгынын жетекчиси Каныбек Туманбаев жана КРнын Акыйкатчысы (Омбудсмени) Жамиля Жаманбаеванын катышты. 

Акыйкатчынын Президент Садыр Жапаров менен болгон жолугушуусунан кийин, институттун материалдык-техникалык базасын чыңдоо максатында автоунааларды сатып алууга 9 миллион сом бөлүнгөн. 

Каныбек Туманбаев Акыйкатчы Жамиля Жаманбаевага Chevrolet Cobalt үлгүсүндөгү 9 кызматтык автоунаанын ачкычтарын тапшырды.

Аталган автоунаалар өлкөнүн 6 облусундагы Акыйкатчынын өкүлчүлүктөрүнө бөлүштүрүлөт.

“Бүгүн кызматтык автоунааларды алуу – бул борбордук аппаратта да, аймактарда да ишибизди күчөтүү үчүн маанилүү кадам. Бүгүн тапшырылып жаткан автотранспорт жарандардын кайрылууларына ыкчам жооп кайтарууга, көчмө иш-чараларды кеңейтүүгө жана өлкөнүн бардык аймагында адамдын укуктарын жана эркиндиктерин натыйжалуу коргоону камсыз кылууга мүмкүндүк берет”, - деди Акыйкатчы. 

Белгилей кетсек, Акыйкатчы Институту аймактарда адам укуктарын натыйжалуу коргоону камсыз кылуу максатында өз өкүлчүлүктөрүнүн иштөө шарттарын жакшыртууга өзгөчө көңүл бурууда. 

Бул багытта материалдык-техникалык база бекемделип, кеңселери оңдолуп, аймактык өкүлчүлүктөрүнүн кызматкерлеринин квалификациясы жогорулатылууда.