Акыйкатчы Институту мектептерде өтүп жаткан кыргыз тили боюнча көчүрүү сынагынын жүрүшүнө мониторинг жүргүзүүдө

КРнын Акыйкатчы (Омбудсмен) Институту билим берүү мекемелеринде кыргыз тили боюнча класстан класска көчүрүү сынагында окуучулардын укуктарынын сакталышын көзөмөлдөө максатында мониторинг өткөрүп жатат. 
27-30-май күндөрү институттун өкүлдөрү 5-6-класстын окуучулары үчүн мамлекеттик тил боюнча милдеттүү экзамендин уюштурулушу жана өткөрүлүшүнө байкоо жүргүзүшөт. 
Мониторинг өлкөнүн 53 мектебинде тандалма тартипте өтүүдө: Бишкек шаарында – 15 мектепте, Ошто – 7 мектепте, Баткен облусунда – 8, Нарында – 12, Жалал-Абад облусунда - 4 , Таласта – 3, Ысык-Көл облусунда – 4 мектепте. 

Институт экзамен учурунда ар бир бала үчүн бирдей шарттар түзүлүшү керектигин белгилейт. Класстар зарыл техникалар менен жабдылып, мектептер санитардык-эпидемиологиялык талаптарга жооп бериши абзел. 

Бишкек шаарындагы №72 мектепте мониторинг жүргүзүүгө уруксат берилбей, №70 мектепте фото жана видеого тартууга тыюу салынды. 

Аймактагы мектептерде институттун мониторингине түшүнүү менен мамиле кылышкан. 

Белгилүү болгондой, быйыл республиканын бардык жалпы билим берүү мекемелеринде менчигинин түрүнө жана окутуу тилине карабастан 5-6-класстын окуучулары биринчи жолу “Кыргыз тили” сабагы боюнча жазуу жана оозеки жүзүндө класстан класска көчүрүү экзаменин тапшырууда. 

Мониторингдин жыйынтыгы боюнча кошумча маалымат берилет.