Атыр Абдрахматова: Дарыгерлерге жана башка медицина кызматкерлерине эч кандай дискриминация болбошу керек
Ушул жылдын 25-апрелинде Акыйкатчы Атыр Абдрахматова Кыргызстандын Медициналык профсоюзунун төрайымы Бермет Барыктабасова, ошондой эле «Демократия жана жарандык коом үчүн» коалициясынын президенти Чолпон Бабалиева жана коалициянын юристи Жыпариза Жумагазиева менен жолугушту.
Тараптар өзгөчө кырдаалда иштеген учурда медицина кызматкерлерине компенсация төлөп берүү укуктарын коргоого байланышкан маселелердин жана көйгөйлөрдүн тегерегинде баарлашты.
«Бүгүн Саламаттыкты сактоо министрлиги дарыгерлерди жана медицина кызматкерлерин COVID-19 коронавирусун той-топурда же үйдө эмес, медициналык мекемеде жана бейтаптардан жуктуруп алганын далилдөөгө мажбурлап жатат Врачтар жана медицина кызматкерлери коронавирус менен ооруган дарыгер же бейтап менен бир бөлмөдө болгонун кантип далилдешет? Бул вирус абада көзгө көрүнбөйт. Инфекциянын убактысы же орду болсо бир жөн? Алар ким 5 мүнөт мурун вирустун жогорку концентрациясы менен коридордо же кеңседе басып, дем алып же чүчкүргөнүн кайдан билишет?».
Көрсө, Саламаттыкты сактоо министрлиги медицина кызматкерлерин ачык эле басмырлап, мындай учурларда тиешелүү компенсацияларды бербей жатат экен. Дарыгерлерге жана медицина кызматкерлерине компенсациялар өзгөчө режим учурунда жумушка чыгып, өз милдеттерин аткаргандыгы үчүн сөзсүз төлөнүшү керек», - деди Бермет Барыктабасова.
Жолугушуунун жыйынтыгында 2020-жылдагы өзгөчө кырдаалда иштеген медицина жана башка медицина кызматкерлерине компенсация төлөп берүү боюнча Акыйкатчынын атайын баяндамасын даярдоо боюнча жумушчу топ түзүү чечими кабыл алынды.
Акыйкатчы белгилегендей, Кыргызстандын ар бир жаранын коргоо КР Акыйкатчы институтунун ишмердүүлүгүнүн артыкчылыктуу багыты. «2020-жылдагы өзгөчө кырдаалда иштеген дарыгерлерге жана башка медициналык кызматкерлерге карата дискриминация болбошу керек.
«Компенсацияларга болгон укуктарды тастыктоого коюлган талаптар укуктук базадагы так эместиктер, боштуктар жана карама-каршылыктардан улам татаалдашпаш керек», - деп баса белгиледи Атыр Абдрахматова.
